Shayad yehi Life hai..!!

Mujhe pata hai yeh mera first hindi post hai ab tak and sab surprised honge ki main hindi mein kyun likh rahi hoon.. actually mujhe break chahiye tha english se.. toh socha yahan par break le loon.. full time angreji padh kar and padha kar main bore ho gayi ;) kya karun meri job he aisi hai.. mujhe angreji mein baat karni padti hai and padhana padta hai english mein, toh bore toh ho he jaungi na.. :D

Hindi mein apni friends se baat karti thi phone par roz, woh bhi ab is city mein nahi hai toh kabhi-2 baat karne ka compromise karna pada. Bechara phone sirf message aur apni boss se baat karne k time par he bajta hai nahi toh sirf message karne bhar ki he iski reputation hai ab. :D Meri best friend is samay Kolkata mein hai and uske papa abhi wahan gaye hain. Maine uske liye ek churan ka packet, 2 anchor stitch kits, ek beautiful sa plastic ka packet jismein yeh sab samaan aagaya woh bheja hai. Woh mere liye coloured pens, necklace and aur bhi cheezein bhej rahi hai.. Sunne mein bachhon jaisa lagta hai par yehi sab woh cheezein hain jinko har baar use karte samay ya fir dekhte he uski yaad ayegi. Apne purane din yaad aayenge jab hum donon saath mein shopping karne jaate they. Main hamesha mere ghar se nikalte waqt late karti thi and woh chillati thi. Shivalay mein mast 2 ghante shopping karte they kabhi jewellery ki dukan par toh kabhi churan ki.. Time toh lagta he tha chahe crowd ho ya na ho. Jab bhi shivalay gay toh wahan k golguppe nhi chhode :) soch kar mann lalcha jata hai..

Uske baad woh parade jana and wahan se books lena.. course ki books lene k time par jaan nikalti thi.. novels lene k time par excited hotey they.. woh itna time nahi lagati thi coz usko pata tha ki usko kaunsi book chahiye.. lekin mere ko time lagta tha kyunki main random book reader hoon.. jo samajh aati hai utha leti thi..

fir uske baad recharge karwate they mobile ka.. mere paas kabhi recharge k liye paise nahi bachte they hamesha zaroorat se zyada kharcha karti thi.. woh apne budget se chalti thi and mera recharge karwa kar kehti thi ki tum mera kisi din karwa dena and main baad mein uska balance dalwati thi.. Uske baad hum log ya toh apne gahron k liye tempo pakadte they ya fir mere ghar jaate they..

Humne 4 saal aise he bitaye hain.. Jo yeh padh raha hoga usko lag raha hoga ki hum logon ney kitna enjoy kiya.. and yeh sach hai hum log masti bhi karte they, gussa karte they and saath mein mazaak bhi karte they..

Ab hum donon ko ek doosre ki bheji hui chhoti-2 cheezein dekh kar tassali karna padta hai.. aaj main akele shivalay jaati hoon, akele parade jati hoon.. zaroorat bhar ka saman lekar bina chat khaye aati hoon.. kitabein dekhne mein abhi bhi utna he time lagta hai lekin mere ko baar-2 ghoorne wali ya impatient ladki mere aas paas nahi hai..Mobile recharge karwane men aafat aati hai.. paise hote huey bhi nahi karwati yeh sochkar kiske liye karun? usse toh online baat ho jaati hai.. fir yeh sochti hoon ki kaunsa har baar online jane ka mauka milta hai.. messaging se he kaam ban jata hai..

City nahi badli lekin aadatein badal jaati hain and uski wajha se log badal jaate hain.. shayad main bhi badal gayi hoon.. apni purani friends se bhi ab khali normal messaging hoti hai phone toh door ab kisi k paas message se he haal chaal poochne tak ka time nahi hai.. yehi haal ab mera hai.. Shayad life badal gayi hai hum nahi badle.. Jo aapki life mein ata hai woh chhodkar chala jata hai lekin dobara woh kis mod par aa jaye yeh koi nahi janta par woh log aate zaroor hain.. Shayad yehi life hai..!!